د ستر پاسوال عبدالرازق اڅکزی د شهادت د څلورم تلین به مناسبت د افغانستان اسلامی جمعیت د رئیس ښاغلې صلاح الدین ربانی پیغام

بسم‌ الله الرحمن الرحیم

د ستر پاسوال عبدالرازق اڅکزی د شهادت د څلورم تلین په مناسبت د دغه زړور قومندان او د وطن ټولو هغو مدافعینو ته چې د خلکو د عزت، ژوند او مال په ساتنه کې یې خپل ځانونه قربان کړی دی، روح ته یی دعا کوم او همداراز د جنرال صاحب تادین خان او د هغوی درنی کورنۍ ته د تسلیت مراتب وړاندې کوم.

کله چې د هیواد له ځمکنۍ بشپړتیا او خپلواکۍ څخه د صادقانه دفاع خبره کیږی او کله چې له ترهګرۍ سره د مبارزې او د طالب ډلې په وړاندې د مقاومت خبره کیږی نو د شهید جنرال عبدالرازق اڅکزی نوم له ویاړه ډک، ښکاره او د یو غوڅ او قاطع نوم په ډول یادیږی.

شهید قومندان اڅکزی په نظامی ډګر کې د خپل مېړانې او زړورتیا تر څنګ له خلکو سره ژورې او ټولنیزې اړیکې درلودې او له هر فرصت څخه یې په استفادې د هغوی مشورې او ستونزې اوریدلې. د همدغو ښو اړیکو له امله وتوانید چې د خپلو دندو په ترسره کولو او هیواد ته د خدمت په لاره کې د خلکو مؤثری همکاری ولری او کندهار ولایت چې ددی ولایت امنیه قومندانۍ یی په غاړه درلوده په یوه امن ولایت بدل کړی.

د شهید جنرال عبدالرازق اڅکزی پوځی او نظامی لاسته راوړنې او پراخه ټولنیز بنسټ؛ هغه ته د افغانستان په سیاسی ټولنه او د سیاستوالو او دولتی چارواکو په منځ کې ځانګړی ځای جوړ کړی و. د ګران هېواد د دښمنانو پر وړاندې د شهید قومندان اڅکزی سرښندنې او زړورتیا د افغانستان په ټولو خلکو کې د هغه شهید لپاره د پام وړ محبوبیت پیدا کړی و او د هغه په شهادت د افغانستان ټولو مېشتو قومونو په بېلابېلو ډولونو ژوره خواشینی څرګنده کړه.

اوسنی شرایطو کې د شهید جنرال عبدالرازق اڅکزی نشتوالی په شدت سره احساسېږی، خو د هغه عزم او مبارزه د خلکو او د هغه د ژوندی پاتې شویو لپاره الهام او غښتلتیا ده او موږ ډاډه یو چې د هغه په شان فکر لرونکی خلک به د ظلم په وړاندې چوپه خوله پاتې نه شی او د هغه لاره به تعقیب کړی.

په پای کې د افغانستان د عزت او کرامت د لارې د شهیدانو روح ته د دعا کولو سره، د لوی خدای (ج) له دربار څخه زموږ د ګران هیواد د سوکالۍ او سرلوړۍ دعا کوم او هیله لرم چې د افغان ولس په کلک هوډ او عزم، له استبداد څخه د خلاصون لپاره ژر تر ژره د دوی په سیاسی برخلیک باندې د دوی د اجتماعی ارادې د حاکمیت شاهدان واوسو.

د ۱۴۰۱ کال د تلی میاشت ۲۶